പ്രിയപ്പെട്ട അല്‍ഫോണ്‍സാ ചേച്ചി അറിയുന്നതിന്‌ കത്രീന എഴുതുന്നത്‌
എന്റെ ചേച്ചി.........രണ്ടുദിവസായി ചേച്ചിക്ക്‌ ഒന്നു ഫോണ്‍ ചെയ്യുന്നതിന്‌ വിചാരിക്കുന്നു.ഇവിടത്തെ ഈ മുടിഞ്ഞ ചട്ടോം നീമോം കാരണം വല്ലതും പറ്റ്വോ? ഇപ്പം ആരുമില്ല.ഒരു മരത്തലയനേം പേടിക്കാണ്ടെ എഴുതാമല്ലോ?പിന്നേ...ഞാന്‍ വീട്ടിലല്ലാട്ടോ..രണ്ടു ദെവസായി ഒരു വയ്റ്റീനോവ്‌.അതിയാനോട്‌ പറഞ്ഞപ്പോള്‍ ഇനി വച്ചോണ്ടിരുന്നാല്‍ പ്റ്റില്ലാന്ന്‌ പറഞ്ഞ്‌ ദേ ഇവിടെയാക്കി...അതിയാന് പോയി..ഇവിടെ ആരുമില്ല.സിസ്റ്റര്‍മാരു പറയ്‌വാ..പുറത്തേക്ക്‌ പോണ്ടാ ഇതിനകത്ത്‌ ഇരുന്നാമതീന്ന്‌.എന്റെ കാര്യല്ലേ..ഞാന്‍ ദാ ഈ കട്ടിലേന്ന്‌ ഇറങ്ങുന്ന പ്രശ്നമില്ല.വേറെയാരൂട്ട്‌ വരൂമില്ല.സുകംതന്നെ ചേച്ചീ..അവളുമാര്‌ വന്ന് എന്തൊക്കെയോ മരുന്ന്‌ തരും.നമ്മള് എന്തോക്കെ ഈ പെണ്ണുങ്ങളുടെ സ്പീഡത്തെപ്പറ്റിപ്പറഞ്ഞാലും ഈ ജന്തുക്കളുടെ മോന്ത കണ്ടാല്‍ കലിവരും.ഒരു വര്‍ക്കത്തില്ലാത്ത ശവങ്ങള്‌..എന്നാലും ഞാന്‍ ക്ഷമിക്കും.പെണ്ണുങ്ങളല്ലേ...ഈ സ്പീഡത്തെപ്പറ്റി ഇവരുമൊക്കെ അറ്യേണ്ടേ?ഞാനിവരോട്‌ പെണ്ണുങ്ങളുടെ സ്പീഡത്തെപ്പറ്റി ഇടക്ക്‌ വച്ച്‌ കാച്ചിക്കോടുക്കും...ചേച്ചിപറഞ്ഞുതന്നപോലെ.അവളുമാര്‌ ഒന്ന് ഇളിക്കും..അല്ലാണ്ടെ കമാന്നൊരക്ഷരം മിണ്ടില്ല.ഒരുത്തിക്കും ആ ബോതമൊന്നുമില്ലന്നേ..അവളുമാര്‌ ഈ ആണുങ്ങളുടെ ഇടി കോണ്ട്‌ കിടക്കുന്ന എരണംകെട്ടതുങ്ങളാണന്ന് എനിക്ക്‌ അപ്പളേ തോന്നി.ചേച്ചിപറേണത്‌ എത്രയോ ശരിയാ..നമുക്ക്‌ ഈ പെണ്ണുങ്ങള്‍ക്ക്‌ വല്ലോ സ്പീഡോമുണ്ടോ?ഈ സാതന്ത്ര്യന്നും ഫ്രീഡന്നും പറയാന്‍ കത്രീനക്ക്‌ അറിയാഞ്ഞിട്ടൊന്നുമല്ല.സ്പീഡമ്ന്ന് പറഞ്ഞാല്‍ അതിന്റെ സ്റ്റയിലൊന്നുവേറെയാ.ആണുങ്ങളുടെ സ്പീഡം ഭയങ്കരം തന്നെയാട്ടോ.ചേച്ചി പറേണത്‌ അച്ചട്ട്‌ ശരിയാട്ടോ. ഈ ആണുങ്ങള്‍ക്ക്‌ എപ്പെവണേലും പുറത്തുപോകാം..പതിരാത്രീന്നോ പെലെകാലേന്നോ ഇല്ല.നമുക്കോ? അവ്ര്ക്ക്‌ റോഡിന്റെ നടുക്കെന്നോ കവലേന്നോ ഇല്ലാതെ വട്ടംകൂടിനിന്ന് കുന്നായ്മ പറയാം..എന്തൊരു സ്പീഡം. ഈ കള്ളുഷാപ്പ്‌ അവര്‍ക്കുമാത്രമല്ലേ?നമുക്കങ്ങാനും അങ്ങോട്ടോന്നു ചെല്ലന്‍ പറ്റ്വൊ? ഈ ആണുങ്ങള്‍ക്ക്‌ എവിടെവേണമെങ്കിലും മൂത്രമൊഴിക്കാം..നമ്മളെങ്ങാന്‍ അങ്ങിനെവല്ലതുംചെയ്താല്‍ പിന്നെ പുകിലായി.. അവര്‍ക്ക്‌ കണ്ട റബ്ബര്‍ തോട്ടത്തിലോ പറമ്പിലോ ഇരുന്ന് ചീട്ടുകളിക്കാം കലുങ്കിമ്മേലിരുന്ന് ഇവമ്മാരുടെ ഒരു വര്‍ത്താനം കണ്ടാല്‍ എനിക്ക്‌ ചൊറിഞ്ഞ്‌ കേറും....ഒരു സ്പീഡം. ചേച്ചി പറേണതെല്ലാം കറക്റ്റാ.. അതിയാനെ ഒരിക്കല്‍ ഞാന്‍ പറ്റിച്ചു. അതിയാനൊരു ശീലമുണ്ട്‌.പെലകാലെ കിടക്കാപ്പായേല്‍ തന്നെ കട്ടന്‍ ചായ കിട്ടണം.കണ്ണുതുറന്നാല്‍ എടീ കത്രീനേ..എന്നൊരു വിളിയാ.അതു കേട്ടാല്‍ എനിക്ക്ങ്ങട്‌ അടിമുതല്‍ മുടിവരെ ചൊറിഞ്ഞ്‌ കേറും.ഒരു ദിവസം ഞാന്‍ അനങ്ങീല്ലാന്ന് മാത്രമല്ല..ഞാന്‍ എണീറ്റ്‌ കെടക്കപ്പായേല്‍ ചടഞ്ഞിരുന്നു. കറിയാച്ചാ പോയേ..പോയി കടുംചായ അനത്തിതന്നേ..അല്‍പ്പം ശബ്ദം കൂടിപ്പോയന്ന് തോന്നുന്നു.കറിയാച്ചന് നടുങ്ങിപ്പോയില്ലേ.ആ മോറ്‌ കണ്ടപ്പോള്‍ എനിക്ക്‌ മനസ്സില്‍ ചിരിയാണ്‌ വന്നത്‌. ഇതേയ്‌ പെണ്ണുങ്ങളുടെ സ്പീഡത്തിന്റെ കാര്യമാ.. കറിയാച്ചന് പൂച്ചക്കുട്ടിയേപ്പോലെ ചായ അനത്തി കത്രീനേടെ മുന്‍പില്‍ കൊണ്ടുവച്ചു...എനിക്ക്‌ ചിരിപൊട്ടി. എന്റെ കത്രീനേ നിര്‍ത്തെന്ന് കറിയാച്ചന് പറഞ്ഞിട്ടും എനിക്ക്‌ പറ്റീല്ലാ ചേച്ചി....പാവം മിണ്ടീല്ല. എന്റെ തലേലെഴുത്തെന്ന് പറേണത്‌ ഞാന്‍ കേട്ടു. വേറൊരു സംബവം പറയാന്‍ ഞാന്‍ മറന്നു,.ഞാന്‍ പറഞ്ഞിട്ടാ അതിയാനൊരു സ്കൂട്ടറുമേടിച്ചത്‌.ചുമ്മാ അതിന്റെ വലത്തേ പിടിയേപ്പിടിച്ച്‌ തിരിച്ചാല്‍ ദേ ശൂന്ന് പൊക്കോളും.നിര്‍ത്താന്‍ ഇടത്തേ രണ്ടുകോലും ചേത്ത്‌ അങ്ങ്‌ പിടിച്ചാല്‍ മതി. ഈ സ്കൂട്ടറോക്കെ കത്രീനക്ക്‌ പുല്ലാ.അതിയാനേം കേറ്റി ഞാനാണ്‌ ഓടിക്കുന്നത്‌... പെണ്ണുങ്ങളുടെ സ്പീഡത്തിന്റെ കാര്യമാ ഇതെന്ന് ഞാന്‍ കറിയാച്ചനോട്‌ പറഞ്ഞു.നമ്മുടെ സക്കറിയാച്ചന്റെ മോള്‍ടെ ആദ്യകുര്‍ബാനക്ക്‌ പോകുവാ..അതിയാന് പുറകിലും..മറ്റത്തിലെ ജോണിച്ചായന്റെ റബ്ബര്‍ തോട്ടത്തിലൂടെ പോകുമ്പോള്‍ കറിയാച്ചന് ഒരു മൂത്രശങ്ക..ഞാന്‍ വണ്ടി നിര്‍ത്തി..കറിയാച്ചന് ആ റോഡരുകില്‍ തുണീം പൊക്കി സാധിക്കുന്നു..എനിക്കങ്ങ്‌ ചൊറിഞ്ഞ്‌ കേറി,.അങ്ങിനെ വേണ്ട..പെണ്ണുങ്ങള്‍ക്കും ഇതിനൊക്കെ സ്പീഡമുണ്ട്‌.ഞാനും മടിച്ചില്ല..ഞാന്‍ തുണിപൊക്കി കറിയാച്ചന്റെ അടുത്തിരുന്നു.എന്നാ പറ്റണേന്ന് അറിയാമല്ലോ?കറിയാച്ചനത്‌ പിടിച്ചില്ല.കാലുമടക്കി എനിക്കോട്ടൊരു തൊഴി.എന്നാലെന്താ എന്റെ ചങ്കൂറ്റം കറിയാച്ചനറിഞ്ഞില്ലേ?..രണ്ടു ദിവസം കറിയാച്ചനെകൊണ്ട്‌ കിഴിപിടിപ്പിച്ചു.എന്റെയൊരു ഗതികേടെന്ന് കറിയാച്ചന് പിറുപിറുക്കുന്നത്‌ ഞാന്‍ കേട്ടു.സത്യത്തില്‍ എനിക്ക്‌ ചിരി വന്നു.. ഓ.. ഞാന്‍ മറന്നു.ചീട്ടുകളിക്കാന്‍ ഞാന്‍ പോയ കാര്യം ചേച്ചിയോടു്‌ പറഞ്ഞിരുന്നോ?
വീടിന്റെ എതിരെയുള്ള റബ്ബര്‍ തോട്ടത്തില്‌ ഉച്ചകഴിഞ്ഞാല്‍ പാണ്ടാലിലെ യാക്കോബ്‌,മടത്തിലെ മാണി ഇവരൊക്കെ വന്ന് ഒരു ചീട്ടുകളി പതിവാ...അലര്‍ച്ചയുംചിരിയും പിന്നെ പറയാനില്ല ബഹളമയം..എനിക്ക്‌ പലപ്പോഴായി ചൊറിഞ്ഞ്‌ കേറുന്നു.ഒരു ദിവസം ഇവര്‌ കളിക്കാന്‍ വന്നിരുന്നതേയുള്ളൂ..കറിയാച്ചന്റെ പട്ടവരയന്‍ അണ്ടേവയറിന്റെ പോക്കറ്റില്‍ കിടന്ന 50 രൂപയുമെടുത്ത്‌ ഞാനുംചെന്നു...യാക്കോബിന്റേം മാണിയുടേയും ഇടയില്‍ കയറി കത്രീന ഒരു ഇരുത്തം.എനിക്കും ഇടടാ ഒരു കൈ..എന്നു പറഞ്ഞു.ഇതു ഞങ്ങളുടെ സ്പീഡത്തിന്റെ പ്രശ്നാന്നും പറഞ്ഞു.യാക്കോബ്ബ്‌ പേടിച്ചുപോയി.പുള്ളിക്കാരന്‍ പതുക്കെ എണീറ്റ്‌ വലിഞ്ഞത്‌ ഞാന്‍ കണ്ടു. മാണി പറഞ്ഞു 'കത്രീനേ നീ പോ... നാളെയാട്ടേ.. ഞാന്‍ വിട്ടില്ല.എന്റെ കൂടെ കളിച്ചാല്‌ നിനക്കെന്നാ പറ്റ്‌ ണത്‌? ഇതെന്നാ ആണുങ്ങള്‍ക്ക്‌ മാത്രം തീറുതന്നതാണോ? ഏതായാലും അവമ്മാര്‌ പതുക്കെ പതുക്കെ വലിഞ്ഞ്‌ സ്ഥലം കാലിയാക്കി.ഇപ്പെ ഇതിലെയുള്ള വരവും നിര്‍ത്തി..നമ്മള് വിട്ടുകൊടുക്കാന്‍ പ്റ്റില്ല ചേച്ചി.. ചേച്ചി പറേണ ഈ സ്പീഡത്തെപ്പറ്റിയൊന്നും നമ്മുടെ പെണ്ണുങ്ങള്‍ക്ക്‌ അത്ര വെവരോന്നൂല്ല.ഞാന്‍ നമ്മുടെ ലീലോടും മറ്യത്തോടും ഒക്കെ പറയാറുണ്ട്‌.കഴിഞ്ഞ ആഴ്ചേല്‍ ഞാന്‍ ലീലോട്‌ പറഞ്ഞു.നമുക്ക്‌ വൈകീട്ട്‌ കലുങ്കേ പോയിരുന്ന് വര്‍ത്താനം പറയാന്ന്.അവള്‌ വരാമെന്നോക്കെ പറഞ്ഞു.അവളു കള്ളിയല്ലേ പറ്റിച്ചു.പക്ഷേ ഞാന്‍ വിട്ടോ? ഞാനൊരു നാലര അഞ്ചായപ്പെ കലുങ്കേലോട്ടു ചെന്നു.നമ്മുടേ ഗോപീം ശങ്കരനും അവിടേര്‍ന്ന് വല്യ വര്‍ത്തമാനം.ഞാനുമവരുടെ ഇടക്ക്‌ കേറി ഒറ്റ ഇരുത്തം.അവന്മ്മാര്‌ വര്‍ത്താനം നിര്‍ത്തി.എനിക്കങ്ങ്‌ ചൊറിഞ്ഞ്‌ കേറീല്ലേ... നീയെന്നാ പറഞ്ഞോണ്ടിരുന്നത്‌..ഞാനും പറയാം..അവരു പറയ്‌വാ..കത്രീനേ വീട്ടിപ്പോ..പെണ്ണുങ്ങളിങ്ങനെ കലുങ്കേലൊന്നും വന്നിരിക്കില്ല. പെണ്ണുങ്ങളുടെ സ്പീഡത്തിന്റെ പ്രശ്നങ്ങളെല്ലാം ഞാന്‍ അവരോട്‌ പറഞ്ഞു.ചേച്ചി പറഞ്ഞു തന്നതുപോലെ... എന്നാ കത്രീന ഇവിടിരുന്നോ എന്ന് പറഞ്ഞ്‌ അവര്‌ വിട്ടു പോയില്ലേ..ഇതാണ്‌ കത്രീന. അതിയാന് ഈ സംബവം അറിഞ്ഞപ്പോള്‍ ഒരു ദഹനക്കേട്‌ പുള്ളിക്കാരനങ്ങനയാ..ഞാന്‍ പറേണതും കാണിക്കണതും പിടിക്കത്തില്ല.ഞാന്‍ തീരുമാനിച്ചിട്ടുണ്ടെന്ന് പറഞ്ഞ്‌ പെരെക്കകത്ത്‌ രണ്ട്‌ നടത്തം.എന്നാ തീരുമാനിക്കാന്‍ ? കത്രീനക്ക്‌ പുല്ലാ? എനിക്ക്‌ ഈ വയറ്റ്‌ നോവ്‌ വന്നതിന്റെ തലേന്നാ..നമ്മുടെ ആ തെക്കേലേ നായരുടെ പെണ്ണില്ലേ.എന്താ അതിന്റെ പേര്‌..ഓര്‍ക്കണില്ല.അവളു പറയ്‌വാ.. എറണാകുളത്ത്‌ പെണ്ണുങ്ങള്‍ക്ക്‌ ബാറ്‌ തോടങ്ങീന്ന്.നീ എങ്ങനാടീ കൊച്ചേ അറിഞ്ഞേന്ന് ചോദിച്ചപ്പെ ..പത്രത്തീന്നാന്ന്..ഈ ആണുങ്ങള്‌ സമ്മതിക്ക്വൊ? എനിക്ക്‌ വിശ്വാസം വന്നില്ല.അവളോട്‌ ഞാന്‍ പത്രം കോണ്ടരാന്‍ പറഞ്ഞു.എന്റെ ചേച്ചീ സത്യാര്‍ന്നു..അവള്‌ പടമൊക്കെ കാണിച്ചു തന്നു.ഒരു പെണ്ണ്‍ ഈ ബ്രാണ്ടികുടിക്കണ കോപ്പേം പൊക്കിപ്പിടിച്ച്‌ നിക്കണപടമാ.കര്‍ത്താവേ..എന്റെ കാലീന്നൊരു പെരുപ്പ്‌.?അങ്ങിനെ പെണ്ണുങ്ങളുടെ സ്പീഡത്തെപ്പ്റ്റി ഈ ബ്രാണ്ടിക്കടക്കാര്‍ക്കെങ്കിലും വിവരം വച്ച്ല്ലോ.ദേ ആ പരസ്യം കീറി ഈ കത്തിന്റെ കൂടെ വച്ചിട്ടുണ്ട്‌.. ഞാന്‍ അതിയാനോട്‌ പള്ളീലേക്കെന്നും പറഞ്ഞ്‌ ഒരു പോക്കു പോയി.ഈ പത്രക്കഷ്ണം കൈയിലുണ്ടായിരുന്നതുകൊണ്ട്‌ തപ്പി കണ്ടുപിടിക്കാന്‍ വിഷമമുണ്ടായില്ല.എന്റെ ചേച്ചീ കാണണ്ടതു തന്നെയാട്ടോ? എന്നാ കെട്ടിടാ..ഞാന്‍ ചെന്ന പാടെ കൂമ്പന്‍ തൊപ്പി വച്ച ഒരുത്തന്‍ എന്നെ തിരി കത്തിച്ച ഒരു മുറിയില്‍ കൊണ്ടിരുത്തി.അവന്റെയൊരു വിനയം.എനിക്ക്‌ ഇപ്പഴാ സമാധാനായത്‌..നമ്മളെയൊക്കെ ഇപ്പെ കണ്ടാല്‍ നടിക്കറായല്ലോ. അതിയാന് വല്ലപ്പോഴും ബ്രാന്‍ഡികഴിക്കണത്‌ ഞാന്‍ കണ്ടിട്ടുണ്ട്‌.ഗ്ലാസ്സെടുത്ത്‌ പകുതി ബ്രാണ്ടീം പിന്നെ ബാക്കി വെള്ളോമൊഴിച്ച്‌ കാണ്ണടച്ച്‌ ഒറ്റ വലി.ഒരിക്കല്‍ ഞാന്‍ അതിയാനോട്‌ പറഞ്ഞ്‌ വഴക്കിട്ടതാ.അതിയാന് പറഞ്ഞു പെണ്ണുങ്ങളുടെ ബ്രാണ്ടി വേറെയാ..പിന്നെ വാങ്ങി തരാമെന്നും പറഞ്ഞു.കറിയാച്ചന് കഴിക്കണത്‌ നമ്മള് കൃസ്ത്യാനികള്‍ക്ക്‌ മാത്രമുള്ള ബ്രാണ്ടിയാ.എന്തോ കൃസ്ത്യാനിന്നൊക്കെ പേര്‌ കറിയാച്ചന് പറേണത്‌ എനിക്കറിയ്യാം ഇവിടത്തെ തിരി വെട്ടം മാത്രം എനിക്ക്‌ പിടിച്ചില്ല.നമ്മുടെ ഈ സ്പീഡം നാലാള്‌ ഒന്ന് കാണ്വാന്നാച്ചാല്‌ പറ്റ്വോ?എന്തെങ്കിലുമാകട്ടെ. കൂമ്പന്‍ തൊപ്പിയോട്‌ കൃസ്ത്യാനിക്കുള്ള ബ്രാണ്ടി ഒരു അര ഗ്ലാസ്സ്‌ തരാന്‍ പറഞ്ഞു.അവന്‍ പറഞ്ഞു..കൃസ്ത്യന്‍ ബ്രതേസ്‌ ഇപ്പയില്ലാന്ന്..വേറൊന്നുമില്ലന്ന് ചോദിച്ചപ്പം അവന്റെ ബോധം തെളിഞ്ഞു.കര്‍ദ്ദിനാള്‍ തരാമെന്ന്..ചേച്ചീ എനിക്ക്‌ അടിമുടി ഒരു തരിപ്പ്‌..കര്‍ദ്ദിനാളേ...ഞാന്‍ കര്‍ത്താവിന്‌ സ്തുതി പറഞ്ഞു അരഗ്ലാസ്സ്‌ ബ്രാണ്ടി വന്നു.കറിയാച്ചന്റെ പോലെ ഞാന്‍ വെള്ളമൊഴിച്ച്‌ ഒറ്റ്‌ വലി.ഓ..നെഞ്ച്‌ കത്തുവായിരുന്നു..എന്നാലും കുറക്കാമോ..പെണ്ണുങ്ങളുടെ സ്പീഡത്തിന്റെ കാര്യമല്ലേ? കൂമ്പന്‍ തോപ്പി വന്ന് പറഞ്ഞു. ഒന്നെടുത്താല്‍ ഒന്നു ഫ്രീയാന്ന്..ഒരെണ്ണം കൂടി തട്ടി..പിന്നെ ഒന്നുകൂടി..ഈ ഏര്‍പ്പാട്‌ വെള്ളിയാഴ്ച മാത്രെ ഉള്ളൂ എന്ന് കൂമ്പന്‍ തൊപ്പി പറഞ്ഞു.പിന്നെ ഞാനങ്ങ്‌ കസറീല്ലേ ചേച്ചീ
..പെണ്ണുങ്ങളുടെ സ്പീഡത്തേപ്പറ്റി കൂമ്പന്‍ തൊപ്പിയേം കണക്കപ്പിള്ളം ഒക്കെ പറഞ്ഞ്‌ മനസ്സിലാക്കി..പിന്നെ എപ്പളാ പെന്നേന്നൊന്നും അറ്യാന്‍ പേറ്റീല്ല. രാവിലെ പെരക്കകത്ത്‌ പായേല്‍ തന്നെയാണു കിടന്നിരുന്നത്‌..എന്തോ വല്ലാത്ത നാറ്റം............... പുറത്ത്‌ ആരെക്കെയോ ഉണ്ട്.കുശുകുശുക്കുന്നത്‌ കേള്‍ക്കാം.കത്രീന ആരാന്ന് ഇപ്പെ മനസ്സിലായിക്കാണും.ചേച്ചീ വല്ലാത്ത ഒരു വയറ്റുനോവുതോന്നി.കറിയാച്ചന് ഒരു ഷര്‍ട്ടൊക്കെ കുത്തിക്കേറ്റിയാണ്‌ വരവ്‌.വയറ്റുവേദനയാണന്ന് പറഞ്ഞപ്പഴേ കറിയാച്ചന് പറഞ്ഞു ഇനി വച്ചോണ്ടിരിക്കുന്നില്ലാ..പോകാന്ന്..അങ്ങിനെ ഇവിടെത്തി.. ചേച്ചീ..ഇന്ന് എന്താണാവോ ആഴ്ച? ഏതായാലും വെള്ളിക്ക്‌ മുന്‍പേ ഞാന്‍പോരും.. അടുത്ത വെള്ളീല്‌ നമുക്കൊന്ന് കൂടാം. ചേച്ചീ സമാധാനായീ...നമ്മള് പറയണത്‌ എന്തെങ്കിലും നടക്കുന്നുണ്ടല്ലോ?ബാറെങ്കില്‍ ബാറ്‌.. ചേച്ചീ നിര്‍ത്തുവാ..വെള്ളിയാഴ്ച മറക്കല്ലേ എന്ന് സ്വന്തം കത്രീന
10 അഭിപ്രായങ്ങൾ:
ഹ ഹ !!
ഇതാരെയോ ഉദ്ദേശിച്ച് എഴുതിയാതാണോ എന്ന് വര്‍ണ്ണ്യത്തിലിച്ചിരി ആശങ്കയില്ലാതില്ല.
:)
kollentidath kollunnund...
ezhuth super..
സൂപ്പര്‍.
ആശംസകള്‍..........
വെള്ളായണി
വ്യത്യസ്ത ശൈലിയിൽ ഉള്ള ഈ എഴുത്ത് നന്നായി.അല്പം നീളം കൂടീല്ലേ ന്നൊരു സംശയോം തോന്നി
മണി മാഷേ,
വായിക്കാന് രസമുള്ള പോസ്റ്റ്, പക്ഷെ ആശയത്തോട് യോജിക്കുന്നില്ല. ഈ ‘സ്പീഡ‘ത്തിനോട് എന്താണ് ഇത്ര അസഹിഷ്ണത?
ആടുത്ത വെള്ളീയാഴ്ച ഒരു സാരിയുടുത്ത് ഇറങ്ങിയാലോ എന്നാലോചിക്കുന്നു.:)
സംഭവം കൊള്ളാം.രസകരമായി. കാന്താരിക്കുട്ടി പറഞ്ഞപോലെ ഇത്തിരി നീളം കൂടിയോന്നൊരു സംശയം.
അനില്‍ജി,
ദേ ചുറ്റലാക്കല്ലേ?ചെറായി മീറ്റില്‍ ചില കണ്ടീഷനുണ്ടെന്നു പറഞ്ഞിട്ടുള്ളതാണ്‌ എന്റെ ഒരു ധൈര്യം.
പിന്നെ നമ്മുടെയിടയിലേക്ക്‌ ആരും ശ്രദ്ധിക്കതെ കടന്നുവന്ന ഒരു പുതിയ സംസ്കാരത്തെ ഇപ്രകാരം പരിചയപ്പെടുത്തിയെന്നേ ഉള്ളൂ"
സമാന്തരന്‍;വെള്ളായണി വിജയന്‍..അഭിപ്രായങ്ങള്‍ക്ക്‌ നന്ദി
കാന്താരിക്കുട്ടി,എഴുത്തുകാരി..
ശരിയാണ്‌..അല്‍പ്പം വിസ്താരം കൂടിപ്പോയെന്ന് പോസ്റ്റ് ചെയ്തശേഷമാണ്‌ തോന്നിയത്‌.നന്ദി
ബാബുമാഷ്‌...
സ്പീഡത്തോട്‌ ഒരു അസഹിഷ്ണുതയുമില്ലന്ന് പറയട്ടെ..
പക്ഷേ സ്പീഡങ്ങളില് ഒരു മുന് ഗണനാക്രമമാണ് നമ്മള് തിരിച്ചറിയേണ്ടത്...അതോടൊപ്പം പരുഷവര്‍ഗ്ഗം പുലര്‍ത്തുന്ന പല സ്പീഡങ്ങളും അതേപോലെ പകര്‍ത്തുന്നതിനും പെണ് വര്‍ഗ്ഗത്തിനാകുമോ?പുരുഷവര്‍ഗ്ഗത്തിനുതന്നെ യോഗ്യമല്ലാത്ത ശീലങ്ങള് തങ്ങള്‍ക്കും വേണമെന്ന് ശാഠ്യം പിടിക്കുന്നതില് എന്താണ് യുക്തി?നമ്മുടെ ഇടയിലേക്ക്‌ ഒളിഞ്ഞും പാത്തും കടന്നുവരുന്ന ചില പുതുശീലങ്ങളെ വേറൊരു രീതിയില്‍ ഞാന്‍ അവതരിപ്പിച്ചെന്നേ ഉള്ളൂ..വളരേ നന്ദി
സത്യത്തില്‍ ഈ വിഷയത്തില്‍ ഒരു ചര്‍ച്ച നടക്കേണ്ടതാണ്.
ഇവിടെ തന്നെ അതിനുള്ള സ്കോപ്പും ഉണ്ട്.
"പുരുഷവര്‍ഗ്ഗത്തിനുതന്നെ യോഗ്യമല്ലാത്ത ശീലങ്ങള് തങ്ങള്‍ക്കും വേണമെന്ന് ശാഠ്യം പിടിക്കുന്നതില് എന്താണ് യുക്തി?"
ഈ പ്രസ്താവനയും തികച്ചും ആപേക്ഷികമാണ്.
പൊതു സമൂഹം തെറ്റാണെന്ന് പറയുന്നത് തെറ്റാണെന്ന് പറയുകയാണ് ഇന്നത്തെ പുരോഗമന ചിന്തയായി കണക്കാക്കപ്പെടുന്നത്. മദ്യപിക്കുന്നത് മോശം ശീലമാണെന്ന് സമൂഹം പറഞ്ഞാല്‍ “മദ്യപിക്കുന്നതിലെന്താണ് തെറ്റ് ” എന്നു ചോദിച്ചാല്‍ പുരോഗമന വാദിയായി.
എഴുത്ത് രസമായിരിക്കുന്നു.
മാഷേ,
എന്റെ ഉള്ളിലും ഒരു MCP ഉണ്ടെന്ന് ആദ്യം തന്നെ സമ്മതിക്കട്ടെ. എന്നാലും ചില കാര്യങ്ങള് പറയാതെ വയ്യ.
“പക്ഷേ സ്പീഡങ്ങളില് ഒരു മുന് ഗണനാക്രമമാണ് നമ്മള് തിരിച്ചറിയേണ്ടത്“
ഈ മുന് ഗണനകള് സ്ത്രീകള്ക്ക് മാത്രം ബാധകമാണോ?
“പരുഷവര്‍ഗ്ഗം പുലര്‍ത്തുന്ന പല സ്പീഡങ്ങളും അതേപോലെ പകര്‍ത്തുന്നതിനും പെണ് വര്‍ഗ്ഗത്തിനാകുമോ?“
വിനയാ, കാന്താരിക്കുട്ടി, നിങളാരെങ്കിലും മറുപടി പറയൂ.
“പുരുഷവര്‍ഗ്ഗത്തിനുതന്നെ യോഗ്യമല്ലാത്ത ശീലങ്ങള് തങ്ങള്‍ക്കും വേണമെന്ന് ശാഠ്യം പിടിക്കുന്നതില് എന്താണ് യുക്തി?“
ഇവിടെ മനുഷ്യവര്‍ഗ്ഗം എന്നുപയോഗിക്കുകയായിരുന്നില്ലേ ഭംഗി? ഈ ജെന്ഡര് റോള് നമ്മള് ആണുങ്ങളുടെ തലയില് നിന്നും മാറില്ലല്ലോ!
പിന്നെ അനില്,
പൊതു സമൂഹം തെറ്റാണെന്നു പറയുന്നത്, തെറ്റാണെന്ന് പറയുന്നത്, തെറ്റാണെന്ന് അനില് ശരിക്കും വിശ്വസിക്കുന്നുണ്ടോ?
ഇതൊരു ചര്ച്ചയായി പുരോഗമിക്കുകയാണെങ്കില് തിരിച്ചു വരാം. :)
Post a Comment